PASAHAT SULANGSULANG PAHOMPU DI JOLO NI BANGKE
Nahinaholongan, bangso Batak songon sada bangso nametmet, mardalan
dohot mangula di bagasan adat na pinungka ni omputa si jolojolo tubu. Tontu
sahali, songon halak batak hita porlu situtu do hita manjaga adatta i songon
sada warisan na tininggalhon ni ompunta si jolojolo tubu i. Alai jotjot sipata
songon sada pribadi na hurang manghaporluhon taringot tu adat songon sada halak
batak hita.
Ima na masa di sada ama na marujung ngolu di sada inganan di kota
Medan. Humalaput ma sisolhotna laho patureture parmonding ni amantai, tarlumobi
ma na mangalap boru sileban ibana, hape nunga sahat tu na marpahompu, ndang disahat
dope adat sigararon na tu hulahulana.
Dipadalan ma adat na hombar tu na paabinghon naung magodang inanta i
tu tulangna huhut pasahat sulangsulang pahompu nasida di jolo ni bangke ni
amanta i. Ndang be tutu hibul mardalan adat angka nahombar tu ulaon i, holang
unokna sambing nama na di pasahat asal ma naung setuju pihak paranak dohot
pihak parboru hombar tu panghataion nasida. Ndung sidung ulaon na hombar tu si,
ditorushon ma muse tu ulaon ni amanta na monding i.
Nahinaholongan. Une do rimanganta namasa sisongon on, songon sada
jolma namangolu hita, tarlumobi ma namarhaporseaon, mangulahon adat ndada gabe
harugian i, alai na mangulahon holong do hita disi, asa ungan ma tubu hata na
mandok: “Nunga mate alai manusai dope”.Taingot ma, na arga situtu do adat na
pingungka ni omputa si jolojolo tubu i. Tarlumobi ma di hita angka ama, marhite na mangulahon adat do hita mananda
dongan tubuta, marhita na mangulahon adat do hita mananda horong ni angka
hulahulat, marhite na mangulahon adat do hita marsaor dohot dongan sahuta, asa
unang ma adong songon inata i na manghabaluhon amantai, naung maheu rohana di
parmonding ni amantai, tamba ma muse naso mangantusi adat ni hita halak batak
ala boru silban ibana, alai ingkon ulahononna ma adat angka naporlu tusi di
jolo ni bangke ni amantai. Tarida ma tutu naso marsaor amantai ala torop so
piga do sisolhot, dongan sahuta tarlumobi ma horong ni angka hulahula.
Hita angka ama ma nuaeng jumolo mangarimangi na masa on, aut sura
tarbaen dope sumangot ni amanta na monding i manghatai tu situan natorop na ro
i, tontu sahali hata arsak do na naeng dohononna paboa napurlu do hape
mangulahon adat. Tarlumobi ma na torop so piga na ro mangadopi adat di partuat
ni amantai, na hurang parsaoran do hape amantai.
Nahinaholongan, tarsingot tu hata “marsaor” adong tolu unok ni
parsaoran di ngoluta, ima:
1.
Marsaor dohot Debata;
2. Marsaor
dohot dongan jolma;
3.
Marsaor dohot ulaon.
Marsaor dohot Debata, boi ma tutu marhite na marminggu dohot na
manjaha manang mambege hata ni Debata di parmingguon dohot di angka
partangiangan. Alai, marsaor dohot Debata boi do taulahon on nang pe so marsaor
hita dohot dongan jolma nang ulaonta.
Marsaor dohot dongan jolma, ima marsaor marhita namangulahon adat
hita, mandohoti punguanpunguan (STM, Marga, punguan Koor, dohot angka na
asing), marhite parsaoran di lapo (Kede Kopi) dohot angka na asing dope. Alai tongtong
do boi ulahononta i marhite naso marsaor hita dohot Debata nang ulaonta.
Marsaor dohot ulaon, ima marhita na mangulahon ulaonta nauli songon
nagabe dalan ni ngoluta, suang songoni marsaor dohot donganta nasaulaon i. Alai
tongtong do boi taulahon i nang pe so marsaor hita dohot Debata nang dohot
dongan jolma.
Tarimangi ma di bagasan rohanta, singkop do nguluta molo taulahon sada
manang dua sian natolu i.
-
Aha ma
panganonta molo holan marsaor hita dohot Debata nang dongan jolma.
-
Ahama jambarta molo holan marsaor hita dohot
dongan jolma nang ulaonta.
-
Aha ma hajongjonganta di adopan ni situaon
natorop molo holan marsaor hita dohot Debata nang ulaonta.
Alai molo marsaor hita di natolu i, toho ma tutu na mangulahon holong
do hita disi songon si ihuthon Debata hita. Las rohata ala tarpasupasu ngoluta,
marhita sian angka ulaonta, torop donganta jala parsidohot hita di harajaon ni
Debata.
Tabi mardongan tangiang.
Parbengkel Do Au
(Siborok Theologi)
GBU Non Stop
Komentar
Posting Komentar