LAS NI ROHANAMI DI TANGSI MANUNGGANG
(Dalam Rangka Bedah Gereja HKBP Tanggsi Manunggang P. Sidempuan)
St Albiner 'Rabar' Siagian
Tung marlasniroha do hami, Punguan Koor Ama Immanuel (KAI), HKBP
Perumnas Simalingkar di na mangebati HKBP Tangsi Manunggang, Resor
Padangsidimpuan Kota, Distrik Tabagsel-Sumbar i. Mamungka sian na borhat
sahat tu na sahat, sai adong angka dongan na marsarito siriburribur.
Pardalanan na 14 jom i, na sasintongna 12 jom, ndang pola nihilala ala
ni angka sirarion i. Songon na somal, ganup di pardalanan mangebati
huria, sai dipangido do tu anggota na imbaru mansaritohon boha ma
parsaut nasida tu inanta i na uju i. Sahali on, adong ma opat halak na
ingkon marsarito. Diboto hamu do? Adong dope hape dongan on na
dipadomudomu manangkas. Adong muse do na i dope ditanda, langsung didabu
holong i. Aha so angka hitir boru ni halak songon i, ate?
Alai,
sian sude sarito taringot kisah-kasih parsaut ni parsondukbolon na hea
disaritohon, ndang adong dope mangambii ribur ni sarito na disaritohon
dongan 2 taon na salpu tagan mangebati HKBP Partuatan, Distrik Silindung
hami. Sarito i digoari: "Coret yang tidak Perlu!" Boasa didok coret
yang tidak perlu? Alusna songon on. Laho mangultophon na di bagas rohana
dongan i tu na naeng parsondukbolonna i, ala dao be do nasida, marhite
surat ma dihatahon. Di surat na i didok ma hirahira songon on: "Aku
cinta padamu! Apakah kamu juga merasakan hal yang sama? Na pariburhon
ima diparade ibana 2 alus sipilliton: a) 'Ya' dohot b) 'Tidak'. Dung i,
di pudi ni alus i didok ibana muse: "Coret yang Tidak Perlu!", huhut
dipadohot perangko (tu balos ni surat) di bagas amplop i.
Bayangkon hamu ma jolo, boha do bahenon ni anakboru mangalusi songon i
ate? "Alai, mauliate ma dohonon, ro ma balos ni surat i naung tarcoret
hata 'Tidak' i!', ninna dongan i mangujungi saritona. Manigor
margahargak ma hami luhut na di bagasan bus i ujui.
Hirahira
pukul 09.00 WIB di Ari Sabtu, sahat ma hami di Huta Tangsi Manunggang.
Nang pe masuk tu Kota Sidempuan huta i, ba huta dope. Jolo boluson do
angka saba, tariparan jambatan, jala salpuan kobun hapea dohot kalapa
sawit, dung mangambirang hami sian Pijor Koling, dung salpu Kota
Padangsidimpuan sabola Sayurmatinggi. (Didok Pijor Koling ala birong do
hape keleur ni pamijoran, ndang bontar songon keleur ni pamijoran na
somal).
Di tongan dalan dope hami, nunga ditongos Amang CSt
Lancar Haposan Pasaribu, ruas ni Punguan KAI naung jumolo borhat tu huta
i, gombaran ni balanga di tataring na mangarobus juhut. Di alaman ni
jabu i dipatudu muse gombaran ni lomang na didadang jonok tu gara ni api
i. Lam hohar ma pangisi ni siubeon jala mandedei ijur marnidasa.
I dope mijur hami sian bus i, dung marsijalangan dohot pigapiga halak
pangisi ni huta i na tongon mamolus, manigor ro ma hopi mardongan
lomang. Mohop duansa. Mago ma heal na marbus i, sumuang gogo ala ni hopi
dohot lomang na mansai tabo i. Marroan ma muse angka pangisi ni huta i
manjalangi hami. Lam martambatamba ma las ni rohanami.
Torop do
hape halak Karisten di huta i. Sian sirpang Pijor Koling sahat tu Huta
Tangsi Manunggang na marsuhat hira 10 batu sajo pe adong do 3 Gareja
HKBP na tarbereng ahu. Godang do tong huria na asing, isara ni Gereja
Kristen Protestan Angkola (GKPA), Huria Pentakosta, dohot Gereja Punguan
Kristen Batak (GPKB). Lopus Huta Tangsi Manunggang i tong do parhutaan
ni halak hita, na margoar Huta Sijukkit.
Dung hudulo hami HKBP
Tangsi Manunggang (gedung lama) dohot gedung na alang dope pembangunanna
i na marholang hirahira 200 meter, mangan arian ma. Tung sagat do hami
antong manganhon jagal aili na dibolgang i. Laos mardomu ma tabona tu
ingkau rata na dirobus i. Ala ni tabona, ndang nisodar be 'simatua' na
tongon mamolus di joloniba. Dung simpul mangan, margallapan ma angka
dongan huhut marukkor modom.
Di pukul 15.00 WIB botarina, borhat
ma hami martapian tu Aek Sijorni (Air yang Jernih) hirahira 30 batu
sabola Sayurmatinggi. Hape, di na borhat i hami, nunga borhat tong Amang
Praeses Distrik 1 Tabagsel-Sumbar, Amang Pdt Horas Purba, MTh dohot
Amang Pdt Rudi Simaremare, STh, pandita Resor Padangsidimpuan Kota, sian
Padangsidimpuan, mandapothon hami. Gabe pajumpang di tongan dalan ma
hami. Diboan nasida sasumpit bolon salak na martagan. So i nama
tonggina. Lam martambatamba ma las ni rohanami.
Aek Sijorni i
ima aek na manguman sampuran, alai ndang apala madabu aek i, hira na
durus do marhasak sian holangholang ni angka batu dohot bona ni
harambir. Ala tongon ndang apala por udan, tio do antong aek i songon
goarna i. Laho tu paridian i, ingkon boluson do titi gantung manaripari
Batang Angkola na paihutihut dalan kudi tu Sayurmatinggi i. Sombu ma
antong tagas na martapian i didappol Aek Sijorni na lambok i.
Di
na laho mulak hami sian partapianan, adong ma sahalak dongan mandok:
"Putar muse bus on! Tu Aek Badak dope hita! Nunga diparade keluarga ni
simatua ni Si Damanik hopi dohot lappet. Ingkon jolo tusi do ninna hita.
(Amang Damanik ima sada ruas ni Punguan KAI na mangalap boru Sianipar
sian huta Aek Badak. Tu Aek Badak on, ingkon salpuan ma sirpang tu Tano
Tombangan--huta panombangan ni halak hita--di Sayurmatinggi. Huta Aek
Badak ma parbatasan tu Kabupaten Mandailing Natal. Tong do angka halak
hita maringanan di huta i. Gareja HKBP Aek Badak mansai tongam jongjong
di topi ni dalan kudi i).
Toho ma tutu, dung sahat hami di bagas
keluarga i, nunga rade be hopi dohot lappet na tong mohop dope. Boi do
ra dibayangkon hamu boha ma tabo ni minum hopi dohot mangan lappet na
mohop dung sidung martapian. Ngalian muse. Dipangido nasida ma hami
markoor dua ende. Di na manghatahatai i hami, adong ma sahalak ina
bongot tu jabu huhut manjalangi hami. Didok ibana ma: "Nunga hupahembang
amak di jabu. Di jabunami ma hita modom bodari on, asa mangallangi jolo
hita. Mansai las rohanami (dohot amanta) di na hubegehami ro hamu sian
Medan tu hutanami on. Di Medan do ahu ujui di na hubege barita i.
Manigor hudok ma: "Di jabunami nasida marborngin!". Di Tangsi Manunggang
do hami marminggu sogot. Asa hubege hami jolo muse endemuna i!" Toho do
antong, ro do nasida sogotna i.
Di panghataionnami, tarboto ma,
andorang di ngolu ni simatua ni Amang Damanik, nunga leleng dipaima
nasida haroronami tu huta i. Alai, andorang so saut napinangidona i,
nunga jumolo marujung ngolu inang i, pigapiga bulan na salpu. "Nang pe
songon i, mansai gok rohanami di haroromuna. Mauliate godang ma!", ninna
Amanguda Sianipar mangujungi hata hamauliateonna. Ndang tarsuhat las ni
rohanami dipanjanghon ni parhutai tu hami. Adong bulus ni roha disi.
Nihilala do i.
Di bodari ni Ari Sabtu (22/04/2017) dipatupa ma
ulaon Parningotan Hatutubu pa-29hon ni Punguan KAI di alaman ni bagas ni
Keluarga Pasaribu. Ribur do pesta i ala tongon diroban Punguan KAI do
musik sabangunan sian Medan.
Di parmingguon sogotna i, Amang
Praeses ma na marjamita. Na maragenda ima Amang Pdt Sabar P Simaremare,
STh, pandita Resor HKBP Perumnas Simalingkar, na manguluhon hami.
Pandita Rudi Simaremare, STh ma anggo na manjaha tingting. Ala mansai
menek do gareja i (7×12 m), ndang siat be parminggu di dalan dohot di
alaman ni gareja i, pola satonga dalan kudi i gabe disaongi asa boi ruas
hundul disi.
Di jamitana i, dipasahat Amang Praeses ma hata
hamauliateon ni ruas ni HKBP Tangsi Manungggang, Ruas ni Resor
Padangsidimpuan Kota, dohot sude Ruas ni HKBP sa-Distrik 1
Tabagsel-Sumbar dipanumpahion ni Punguan KAI. "On ma na nidokna 'Huria
Mangurupi Huria (HMH)'. Angka sisongon on ma na ringkot pahembangonta di
HKBP!", ninna Amang Praeses i mangondolhon.
Dung sidung
parmingguon i, dipatupa nasida ma ulaon na marpardomuan tu na pasahat
pangurupion i. Diulosi nasida ma hami dohot ulos Siganjang Rambu.
Martambatamba muse ma las ni rohanami.
Dung simpul ulaon
parmingguon, diuduti ma acara parmanganon. Tung sagat do hami antong
manganhon juhut na margota i dohot ihan mas arsik na holpu i. Indahanna i
pe tonggi, ala boras 'huta' i do didahan.
Marendei ma natorop i
huhut patupa 'pandurungon' laho manumpahi pembangunan ni huria i. Taho
do antong tarpapungu tumpak i. Marlas ni roha sude!
Di na
martading hata hami, adong ma sahalak ina mandok marhite mik: "Salamat
jalan ma ate Amang. Horashoras ma hamu di pardalanan. Adong do saotik
siluanami. Otik so sadia, las ma rohamu manjalosa!". Toho ma tutu, nunga
rade sasumpit be hami salak. Tung las ma tutu rohanami manjalosa.
Selamat tinggal HKBP Tangsi Manunggang. Menek do ho nian, alai pangisim
angka na uli lagu. Bo pe alang dope bagasmi, ingkon saut do ho singkop
jongjong. Pos do roha, ai mora do Tuhan i. Sai tarungkap ma angka roha
ni ruas ni HKBP mangurupi ho.
Lagu Karo: Cinta Pertama (Anita Barus)
Komentar
Posting Komentar